Мемлекет басшысы Қасым-Жомарт Тоқаев туризм саласын, соның ішінде емдік-сауықтыру туризмін дамыту өңірлердің экономикалық өсіміне серпін беретін маңызды бағыттардың бірі екеніне ерекше назар аударып келеді. Бүгінде Сарыағаш ауданында шипалы минералды және термалды суларды тиімді пайдалану негізінде сауықтыру туризмі қарқынды дамып келеді. Шипалы суымен кеңінен танылған Сарыағаш шипажайларына келушілер саны жыл сайын артып, бұл салаға деген сұраныс жоғары деңгейде қалыптасып отыр. Соған байланысты ауданда жаңа сауықтыру нысандары кезең-кезеңімен іске қосылуда.
Сол игі бастамалардың жалғасы ретінде Жартытөбе ауылдық округіне қарасты Ынтымақ елді мекенінде «Uzak Zhasau» шипажайы пайдалануға берілді. Нысанның салтанатты ашылу рәсіміне Сарыағаш ауданының әкімі Арман Абдуллаев қатысып, жаңа шипажайдың лентасын қиып, ресми түрде іске қосты.
Іс-шара барысында аудан әкімі шипажайдың жұмысымен танысып, жеке кәсіпкер Құрбанкүл Махановаға алдағы жұмысына сәттілік тіледі. Сондай-ақ, салтанатты рәсімге аудандық мәслихат депутаттары, зиялы қауым өкілдері және ауыл тұрғындары қатысты.
Жаңа шипажай заманауи талаптарға сай жабдықталған. Нысан бір мезетте 80–100 адамды қабылдай алады. Жобаның жалпы құны 780 миллион теңгені құрайды. Мұнда келушілерге емдік-сауықтыру процедуралары, тынығу және денсаулықты қалпына келтіруге арналған толық жағдай жасалған.
Шипажайдың іске қосылуы нәтижесінде 30 жергілікті тұрғын тұрақты жұмыспен қамтылып, ауыл халқының әлеуметтік жағдайын жақсартуға және жұмыспен қамту деңгейін арттыруға оң әсерін тигізуде.
Жалпы, Сарыағаш ауданында емдік-сауықтыру туризмін дамыту бағытындағы жұмыстар алдағы уақытта да жалғасып, жаңа инвестициялық жобалардың жүзеге асуына жол ашпақ.
