Мемлекет басшысы Қасым-Жомарт Тоқаев Түркістанда өткен Түркі мемлекеттері ұйымының бейресми саммиті түркі әлемінің рухани астанасы саналатын көне шаһардың халықаралық деңгейдегі беделін тағы бір мәрте айқындағанын атап өтті. Президенттің айтуынша, бұл маңызды жиын Түркістанның мәдени-гуманитарлық ықпалдастықтың әлеуетті орталығы ретіндегі мүмкіндігін танытып, өңірдің инфрақұрылымдық және ұйымдастырушылық әлеуетін жоғары деңгейде көрсетті.
15 мамыр күні өткен саммиттің қорытындысы бойынша Мемлекет басшысы арнайы жиналыс өткізіп, халықаралық іс-шараны жоғары деңгейде ұйымдастыруға атсалысқан Түркістан облысының әкімі Нұралхан Көшеровке және өңір тұрғындарына ризашылығын білдірді.
Президент атап өткендей, шет мемлекеттердің басшылары мен саммитке қатысушылар Түркістандағы көлік жолдарының сапасына, жасыл желекке көмкерілген көшелер мен саябақтардың тазалығына ерекше оң баға берген. Бұл – өңірде жүргізіліп жатқан жүйелі абаттандыру мен инфрақұрылымды дамыту жұмыстарының нақты нәтижесі.
Мемлекет басшысы облыс және қала әкімдігіне көне Түркістанды тек Қазақстанның ғана емес, тұтас түркі дүниесінің жауһары ретінде дамытуға айрықша мән беруді тапсырды. Сонымен қатар шаһардың тарихи келбетін сақтай отырып, оның туристік, мәдени және рухани әлеуетін арттыру міндетін жүктеді.
Жиын барысында Президент ел абыройын асқақтатқан маңызды шараны ұйымдастыруға үлес қосқан әкімдік қызметкерлерін, мемлекеттік мекемелер мамандарын, әскери және құқық қорғау органдарының өкілдерін, коммуналдық сала жұмысшыларын, еріктілер мен белсенді азаматтарды мемлекеттік наградалармен, құрмет грамоталарымен және алғыс хаттармен марапаттау туралы шешім қабылданғанын жеткізді.
