Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» бағдарламасы аясында елімізде барлық өңірлерінде экологиялық мәдениетті қалыптастыру, қоғамдық орындардың тазалығын сақтау және елді мекендерді көркейту бағытындағы жұмыстар қызу жүргізілуде. Осы игі бастама аясында жуырда Сарыағаш ауданында Жастар аллеясы аумағында кең көлемді абаттандыру және санитарлық-тазалық жұмыстары ұйымдастырылды.
Тазалық шарасының басты мақсаты – қоғамдық орындардың тазалығын сақтау, тұрғындардың экологиялық мәдениетін арттыру және жастарды туған жерге жанашырлықпен қарауға тәрбиелеу. Іс-шара барысында аллея аумағы күл-қоқыстан толықтай тазартылып, жасыл желектер мен ағаштар суғарылды. Сонымен қатар, шөптер шабылып, жаяу жүргіншілер жолдары ретке келтіріліп, демалыс аймағының көркі жаңаша ажарлана түсті.
Аталған іс-шараға белсенді жастар, еріктілер және қоғамдық ұйым өкілдері қатысып, ортақ іске өз үлестерін қосты. Олар қоғамдық орындарды таза ұстау әрбір азаматтың міндеті екенін атап өтіп, қала тазалығына бейжай қарамауға шақырды. Жастардың белсенділігі мен ұйымшылдығы көпшілікке үлгі болып, туған өлкені көркейту жолындағы жауапкершіліктің маңызын айқындай түсті.
Іс-шара барысында тұрғындар мен жастарға табиғатты аялау, экологиялық мәдениетті қалыптастыру бағытында түсіндіру жұмыстары жүргізілді. Сондай-ақ ұйымдастырушылар қоршаған ортаның тазалығы адам денсаулығы мен қоғам мәдениетінің айнасы екенін айтып, тазалықты сақтау күнделікті өмір салтына айналуы қажеттігін жеткізді.
