Мемлекет басшысы Қасым-Жомарт Тоқаев аграрлық салада су ресурстарын тиімді пайдалану және ағын суды үнемдейтін озық технологияларды кеңінен енгізу мәселесіне ерекше назар аударуда. Президент тапсырмасына сәйкес, қазіргі таңда еліміздің өңірлерінде су тапшылығының алдын алу, егіс алқаптарының өнімділігін арттыру және заманауи суару әдістерін енгізу бағытында жүйелі жұмыстар жүргізілуде.
Ордабасы ауданының әкімі Азат Оралбаев Бадам ауыл округінің халқымен кездесуінде аудан көлемінде су үнемдеу технологияларын енгізу жұмыстары қарқынды жүргізіліп жатқанын мәлімдеді.
Аудан әкімінің айтуынша, 2025 жылы Ордабасы ауданы бойынша жалпы көлемі 1 595 гектар егістік алқапқа жаңбырлатып және тамшылатып суару жүйелері енгізілген. Бұл технологиялар ағын суды тиімді пайдаланып қана қоймай, ауыл шаруашылығы дақылдарының өнімділігін арттыруға мүмкіндік береді.
Атап айтқанда, Бадам ауыл округінде 60 гектар жерге жаңбырлатып суару, ал 26,5 гектар жерге тамшылатып суару технологиясы енгізілген. Заманауи суару тәсілдері арқылы су шығыны азайып, егіс алқаптарының сапалы суарылуына қол жеткізілуде. Сонымен қатар, биыл аудан көлемінде тағы 2 580 гектар жерге су үнемдеу технологияларын енгізу жоспарланып отыр. Бұл бағыттағы жұмыстарды жүзеге асыру үшін мемлекет тарапынан шаруаларға жан-жақты қолдау көрсетілуде.
Аудан басшысының мәліметінше, су үнемдеу технологияларын енгізу барысында шаруалардың шығындарының 80 пайызына дейін мемлекеттік субсидия қарастырылған. Мұндай қолдау ауыл шаруашылығы саласындағы заманауи технологияларды кеңінен енгізуге және шаруалардың шығынын азайтуға мүмкіндік береді.
Қорыта айтқанда, жаңбырлатып және тамшылатып суару жүйелері суды үнемдеумен қатар, топырақтың құнарлылығын сақтап, ауыл шаруашылығы өнімдерінің сапасы мен көлемін арттыруға оң әсер етеді. Бұл өз кезегінде аграрлық саланың тұрақты дамуына және азық-түлік қауіпсіздігін қамтамасыз етуге ықпал етпек.
