Мемлекет басшысы Қасым-Жомарт Тоқаев бастамасымен жүзеге асырылып жатқан Таза Қазақстан жалпыұлттық жобасы аясында елімізде экологиялық мәдениетті қалыптастыру, қоршаған ортаны қорғау және жас ұрпақтың экологиялық жауапкершілігін арттыру бағытындағы жұмыстар жүйелі түрде жүргізілуде.
Осы игі бастама шеңберінде Созақ ауданының бірқатар білім беру ұйымдарында KATKO компаниясының бастамасымен “Жасыл мектеп” экологиялық бағдарламасы жүзеге асырылуда.
2025–2026 оқу жылында 5 мектепті қамтитын жоба аудан орталығындағы А. Сүлейменов атындағы жалпы білім беретін мектеп базасында бастау алды. Шара барысында аудан әкімінің орынбасары Алтын Ешанқұлова жас ұрпаққа экологиялық тәрбие беру бүгінгі күннің маңызды міндеттерінің бірі екенін атап өтті.
Жоба аясында оқушылар қоқыс қалдықтарын сұрыптау және қайта өңдеу жұмыстарына белсенді қатысуда. Бүгінге дейін мектеп оқушылары 1 321 келі қағаз, 102 келі пластик бөтелке, 56 келі пластик қақпақ және 52 келі алюминий қалдықтарын жинаған. Сонымен қатар, 30-дан астам экологиялық дәріс ұйымдастырылып, оқушылардың экологиялық білімін арттыруға бағытталған түсіндіру жұмыстары жүргізілді.
Өткізілген эко-фестиваль барысында балалар пластик қалдықтарды қайта өңдеу процесімен танысып, тұрмыстық қалдықтарды сұрыптаудың маңызын тәжірибе жүзінде көрді. Мұндай шаралар оқушылардың табиғатқа деген жауапкершілігін күшейтіп, экологиялық сананы қалыптастыруға ықпал етуде.
Алдағы уақытта экологиялық жобалар Сүгір Әліұлы атындағы мектеп, І. Кеңесбаев атындағы мектеп, Абай атындағы мектеп және Ж. Қаламбаев атындағы мектеп білім ошақтарында жалғасын табады. Айта кетейік, KATKO компаниясы Созақ ауданында бүгінге дейін әлеуметтік-экономикалық бағыттағы 500-ге жуық жобаны жүзеге асырып, өңірдің дамуына елеулі үлес қосып келеді.
