Мемлекет басшысы Қасым-Жомарт Тоқаев ел экономикасын әртараптандыру, өңірлерге инвестиция тарту және жаңа өндіріс орындарын ашу мәселесін мемлекеттік саясаттың басым бағыттарының бірі ретінде айқындап келеді. Президент тапсырмасына сәйкес бүгінде еліміздің барлық өңірлерінде кәсіпкерлікті қолдау, өндірісті дамыту және жаңа жұмыс орындарын құру бағытында жүйелі жұмыстар жүргізілуде.
Осы бағыттағы жұмыстар Ордабасы ауданында да кезең-кезеңімен жүзеге асырылып жатыр. Аудан әкімі Азат Оралбаев Төрткүл ауыл округінің тұрғындарымен кездесуінде ауданға инвестиция тарту және өндірістік әлеуетті арттыру бойынша нақты жобалар қолға алынғанын мәлімдеді.
— Қазіргі таңда ауданға 10 миллиард теңге көлемінде инвестиция тартылып отыр. Темірлан аймағынан өндірістік аймақ ашу жоспарлануда. Бірқатар инвестициялық жобалар жүзеге асырылып, бірнеше зауыт өз жұмысын жүргізуде, — деді аудан әкімі.
Аудан әкімінің айтуынша, инвестициялық жобаларды жүзеге асыру өңір экономикасының дамуына серпін беріп қана қоймай, жаңа жұмыс орындарын ашуға және тұрғындардың әл-ауқатын арттыруға мүмкіндік береді. Әсіресе, өндіріс орындарының көбеюі ауданның экономикалық әлеуетін күшейтіп, кәсіпкерлік белсенділікті арттыруға оң әсер етуде.
Сонымен қатар, кездесуде Төрткүл ауыл округінде өндірістік парк ашу бағытында да жұмыстар қолға алынуы қажеттігі айтылды. Бұл мәселе ауданның өндірістік мүмкіндігін кеңейтіп, ауылдық аумақтардың экономикалық дамуына тың серпін беру мақсатында қарастырылуда. Азат Оралбаев бұл бағыттағы жұмыстар ауыл округінің әлеуетіне қарай жүзеге асырылатынын атап өтті. Оның айтуынша, Төрткүл аумағы ауыл шаруашылығына бейім өңірлердің бірі болғандықтан, болашақта агроөнеркәсіптік бағыттағы жобаларға басымдық берілуі мүмкін.
Сондай-ақ, аудан әкімі жуырда облыс әкімінің қатысуымен өткен жиында ауыл шаруашылығын дамыту мәселелері кеңінен талқыланғанын жеткізді. Кездесу барысында аграрлық саланы жаңа технологиялар арқылы дамыту, инвестиция тарту және өнім көлемін арттыру мәселелері қаралған.
Аудан басшысының айтуынша, алдағы уақытта Төрткүл ауыл округімен ауыл шаруашылығы бағытында тығыз жұмыстар жүргізу жоспарланып отыр. Бұл өз кезегінде өңірдегі аграрлық сектордың дамуына және ауыл тұрғындарының табысын арттыруға мүмкіндік бермек.
