Кеңес әскерлерінің Ауғанстан жерінен шығарылғанына 32 жыл

Кеңес әскерлерінің Ауғанстан жерінен шығарылғанына 32 жыл толуына орай «Есімі мәңгі өшпейді, елім деп өткен ерлердің» атты тақырыпта іс-шара өтті. Қалалық С.Қожанов атындағы саябаққа жиналған көпшілік әсерлі естеліктерімен бөлісті.
Қалалық ішкі саясат бөлімінің басшысы Т.Сүлейменов Ауғанстан жерінде әскери борышын өтеген азаматтардың ерлігі мен еңбегі жоғары екендігін жеткізді. Жастар тәрбиесінде жасалып жатқан жұмыстарды атап өтті.
— Бүгін біз Ауған соғысында опат болған жауынгерлеріміз бен ардагерлеріміздің ерлігін еске алуға жиналып тұрмыз. Сол бір қатыгез соғыстың аяқталғанына биыл 32 жыл толып отыр. Бұл – біздің тарихымыздағы елеулі оқиғалардың бірі. Қаншама жауынгер бүгінде ортамызда жоқ. Алайда олардың жасаған ерлігі ешқашан ұмытылмайды, — деді Төрехан Жақашұлы.
Қалалық ақсақалдар алқасының мүшесі Ө.Жүсіпов және жастар атынан сөз алған Е.Жамалов жастарға патриоттық тұрғыда тәрбие беру жолында жасалып жатқан игі бастамаларды сөз етті.
Ауғанстан ардагерлері ұйымының төрағасы М.Ерназаров жыл сайын арнайы іс-шара ұйымдастырып, ардагерлерге қолдау көрсетіп келе жатқан қалалық әкімдікке алғысын айтты.
Көпшілік Ауғанстан жерінде бақилық болған ардагерлерді үнсіздікпен еске алып, ескерткішке гүл шоқтарын қойды.