Жеті жыл бойы салынып жатқан жерасты автожолының құрылысы қыркүйекте аяқталады

Түркістан облысында 7 жыл бойы салынып жатқан жерасты автожолының құрылысы қыркүйекте бітеді. Мердігер компания өкілдері «Жол активтері ұлттық сапа орталығына» осындай мәлімет берді. Құрылысшылар Боралдай тауын індете қазып, бір-біріне параллель екі тоннель салған. Толығымен гидроизоляциялық материалмен қымтап, арматурамен тоқып, бетонмен қаптап жатыр.
Бұл Шымкент қаласы мен Жамбыл облысы шекарасындағы Шақпақ ата ауылының тұсы. Жалпы ұзындығы — 840 метр. Ені -13, биіктігі 9 метр. Басы Түлкібас ауданынан басталып, Жамбыл облысы территориясынан бір- ақ шығады. Жерасты жолы бұл жерге бекерден- бекер салынып жатқан жоқ. Бұл — «Күйік асуы» секілді «Батыс Еуропа-Батыс Қытай» трассасының ең қауіпті тұсы. Тау жоталарының арасы үнемі азынап тұрады. Үскірік жел жеңіл көлік түгіл, ауыр техникаларды да бел ортасына дейін көміп тастайды.
Тоннель осындай жол азабын жеңілдету үшін салынып жатыр. Тау ортасы болған соң күрделі инжернерлік-техникалық шешімдерді қажет еткен жағдайлар болды. Жер асты сулары шығып кетті. Төбесі опырылып құлады. Құрылысшылар сондай қауіп-қатерге карамай, тоннель құрылысын жалғастыруда. Бұл Қазақстандағы теңдессіз әрі жалғыз жерасты автожолы болмақ.