Ұлы дала аңыздары

Кентау балалар көркемсурет мектебінің оқушылары «Ұлы дала аңыздары» атты республикалық онлайн сурет байқауына қатысып, жүлделі орындарды иеленді. Байқайды Қазақстандық Ұлттық ЮНЕСКО Клубтары Федерациясының Түркістан облысы мен Шымкент қаласының аймақтық өкілдігі, Шымкент қаласы білім басқармасының «Балалар көркемсурет мектебі — ЮНЕСКО Клубы ұйымдастырды.
Атап айтар болсақ, Мұхамедәлі Бахтияр І-орынды, Ширин Сайдахметова ІІІ-орынды жеңіп алды. Ал, Ақбота Нарикбаева және Дилноза Султанова арнайы дипломдармен марапатталды. Байқауға қатысқан барлық оқушыларға сертификаттар табыс етілді.
«Ұлы дала аңыздары» атты республикалық онлайн сурет байқауына дарынды шәкірттер дайындаған ұстаздарға Кентау балалар көркемсурет мектебі директоры өз алғысын білдірді.
Байқау өскелең ұрпаққа еліміздің мәдениетін жаңғыртуға өз үлестерін қосуға, өткен тарихқа қызығушылық қалыптастыруға, патриотизмге, толеранттылық пен жаһандық азаматтыққа тәрбиелеуге бағытталған. Мұндағы мақсат — оқушылардың ой-өрісі мен көзқарастарын кеңейтіп, шығармашылық қабілеттерін және эстетикалық талғамын дамыту, ғасырлар бойы ұрпақтан ұрпаққа біздің ата-бабаларымыз арқылы беріліп келген қазақ халқының тарихы, ертегілері, аңыздарын насихаттау.
Барлық аңыздар Қазақстанның рухани киелі жерлерімен байланысты, бұл бізге олар туралы көбірек білуге мүмкіндік береді. Байқауға мектептен тыс қосымша білім беру мекемелеріндегі 7-17 жастағы оқушылар салған суреттері қатысты. Қазақ халқының ертегілері, аңыз әңгімелері бойынша талапкердің қалауымен өзіндік ерекшілігі бар сюжет көрінісінен тұратын шығармалары ұсынылды.
Байқаудың қорытындысы бойынша жеңімпаздарды анықтауға Қазақстан суретшілер одағының мүшелері және білікті мамандар шақырылды. Олар байқаудың жеңімпаздарын анықтап марапаттауға ұсынды.