8 наурыз — Халық-аралық әйелдер күні мерекесінің қарсаңында қала әкімі Дәурен Махажанов іскер әйелдермен кездесті. Салтанатты шарада аналар мен аруларды мерекемен құттықтаған қала басшысы арнайы сыйлықтарды табыс етті.
— Көктемнің шуақты сәті аналарымыз бен аруларымыздың мейрамынан бастау алады. Бір қолымен бесікті, екінші қолымен әлемді тербеген аналар мен арулар қауымы ел ертеңіне нәр, тіршілікке әр беретін айрықша күшке ие. Ана қуанышы, әйел қуанышы — әр үйдің, отбасының, Отанның мерейі. Шуақты көктем мерекесі өмірлеріңізге тек жақысылық алып келсін. Сіздерге зор денсаулық, отбасыларыңызға бақ-береке, қызметтеріңізге табыс тілеймін! — деді қала әкімі.
Іс-шарада «Әжелер алқасының» төрайымы Роза Жұмабаева, «Аналар кеңесінің» төр-айымы Маржан Кривенцова, кәсіби медиатор Жанат Таукеева, «Счастье здесь» дәмханасының иесі Василина Прокудина, «Дармина» ЖШС директоры Рауза Мубарова қалада жүзеге асып жатқан жұмыстарды сөз етіп, игі бастамаларға ұйытқы болған қала басшысына алғыстарын айтты.
