Мұқағали Мақатаев — 90 жыл «Қазақ поэзиясының биік шыңы»

Жыл керуені алға жылжыған сайын Мұқағали Мақатаевтың артына қалдырған өшпес мұрасы жарық жұлдыздай қараңғы түн қойнауынан құпия сәулесін шашқандай жарқырайды. Биыл 2021 жыл «Бір ел — бір кітап» республикалық акциясына «Тәуелсіздігіміздің 30 жылдығына — 30 кітап» таңдалып алынған болатын. «Поэзия» жанры бойынша қазақтың біртуар ақиық ақыны, қазақ поэзиясының мұзбалағы Мұқағали Мақатаевтың 90 жылдығына орай «Өмірдастан» атты өлеңдер жинағы еніп отыр.
Артына айрықша өшпейтін із қалдырған Мұқағали Мақатаевтың өмірі мен шығармашылығын насихаттау мақсатында Түркістан облыстық арнаулы кәсіптік колледжінде «Қазақ поэзиясының биік шыңы» тақырыбында әдеби-поэзия кеші өтті.

Кентау қалалық орталық кітапхана ұжымы ұйымдастырған іс-шара барысында колледждің білім алушылары Аягөз Ибрагимова, Тұрсынкүл Керимшеева, Қуаныш Қарлыбаев, Нұрхан Жақсылық, Салидат Сейдалхан, Эрбол Тожибаев, Жандос Абдиев ақиық ақынның жалынды жырларын оқыды.
Сондай-ақ, Эрбол Тожибаев «Есіңе мені алғайсың» әнін, сазгер, зейнеткер –ұстаз Жұпаркүл Бекшораева «Мен сені сағынғанда…» әнін, колледждің педагог-ұйымдастырушысы Дәулет Жүзтаев ақынның «Сәби болғым келеді» әнін нақышына келтіре орындады.
«Ғасыр ақыны» атанған Мұқағали жырлары жылдан-жылға, ғасырдан-ғасырға жалғаса бермек!
Жанна Қуандықова
Кентау қалалық орталық кітапхананың абонемент бөлімінің кітапханашысы