Дәрігерлер шалғай ауылдардағы тұрғындарды жылжымалы медициналық кешенде қабылдады

Кентау қалалық емханасының жылжымалы медициналық кешені қолжетімді сапалы медициналық көмек көрсету мақсатында арнайы мамандар және лабораторлы-инструменталды тексеруден өткізу шаралары бойынша Оранғай ауылында болды.
Кентау қалалық емханасының дәрігерлері қаладан шалғай орналасқан Оранғай ауылының 300-ге жуық тұрғынға медициналық кеңес беріп, түсіндірме жұмыстарын жүргізді.
Атап айтқанда, жылжымалы диагностикалық кешені негізінде көрсетілетін қызметтер «Әлеуметтік медициналық сақтандыру қоры» коммерциялық емес акционерлік қоғамы тарапынан қаржыландырылды. Заманауи медициналық кешені флюорография, УЗИ, ЭКГ, офтальмоскоп, оториноскоп, кіші лаборатория, әйелдерді қарау бөлмесі және жалпы тәжірибелі дәрігер кабинетімен жабдықталған. Ауыл тұрғындары жоғарыда аталған аппараттарға қалаға бармастан өтті.

Оранғай ауылының тұрғындарына медициналық және скринингтік тексерулер мен басқа да көмектер көрсетілді және де үй жағдайындағы науқасты сол мезетте үйіне барып тексеруден өткізді. Бұл өз ретінде, ауыл тұрғындарының медициналық қызметтерге қолжетімдігін арттырады. Емханадан келген арнайы дәрігерлер ауыл тұрғындарын толық тексеруден өткізіп, ауруды дер кезінде анықтау мақсатында ауыл тұрғындарына жолдамалар берді. Оранғай ауылындағы тұрғындар үшін бұл диагностикалық кешен сапалы және өте тиімді.
Сонымен қатар, емхананың профилактикалық бөлімінің меңгерушісі Нұрсұлтан Қарабаев міндетті әлеуметтік медициналық сақтандыру (МӘМС) жүйесі жайлы тұрғындарға жан-жақты түсіндірме жұмыстарын жүргізді. Себебі, бұл Қазақстандағы әрбір тұрғынға қатысы бар, маңызды реформа.
Консультация барысында шалғай елді мекендердің тұрғындары МӘМС жүйесінің артықшылықтары, кепілдендірілген тегін медициналық көмек және міндетті әлеуметтік медициналық сақтандыру пакеттері шеңберінде көрсетілетін қызметтер, сақтандыру жарнасының мөлшері, бірыңғай жиынтық төлемді төлеу тәртібі, мемлекет тарапынан сақтандырылатын санаттар жайлы атап өтті.