Ал, қанекей жігіттер!

Ата-бабамыз ұл баланы ертеңгі абыройлы әке, қадірлі отағасы, елді қорғайтын ер, батыр, би, ақын, ұлттың намысты азаматы ретінде әділдікке, қайсарлыққа, кешірімді болуына, өнерге, білімге, салт-дәстүрімізді сақтауға тәрбиелеген. Ұл бала — қазақта шаңырақ иесі, ер-азамат — ата-ананың отын тұтатушы болып саналады. «Ұлға отыз үйден тыйым, он сан үйден сын» демекші, ер жігітке айтылар сын көп, қойылар талап жоғары. Халықтың дәстүрлі тәрбиесінде осы баға — «жігіт сыны» деп аталады.
Кентау оқушылар үйінің жылдық жоспарына сәйкес, жасөспірімдерді қоғам өміріне бейімдеу, ата салтын насихаттай отырып, нағыз қазақ жігітінің бойындағы қасиеттерімен таныстыру, олардың патриоттық рухын ояту, салауатты өмір салтын қалыптастыру мақсатында қашықтықтан «Ал, қанекей жігіттер!» іс-шарасы өтті.
Кентау қаласының адами әлеуетті дамыту бөлімінің әдіскері Н.Күзембаева, Кентау қалалық полиция бөлімінің ювеналдық полиция бөлімінің аға инспекторы Ж.Ахметов және спорт мектебінің жаттықтырушысы Б.Совет мыңнан жүйрік, жүзден тұлпар жастарды анықтады. Қазылар алқасы сайыпқырандардың ақыл-парасаты мен өнеріне, қайраты мен күшіне баға беріп, жеңімпаздарды марапаттады.
Атап айтар болсақ, №14 мектептің оқушысы Дулат Уразбаев бас жүлдені жеңіп алды. Ал, №2 мектеп оқушысы Саматжан Набиев І-орынды иеленсе, №1 мектептің оқушысы Ардақ Жолдас және №16 мектептің оқушысы Баубек Сулейменов ІІ-орынды қанжығалады. ІІІ-орын №19 мектептің оқушысы Ярослав Белавин, №24 мектептің оқушысы Нәжмиддин Рахман және «Достық» мектебінің оқушысы Бақытжан Айдарұлына бұйырды.
Шорнақ мектебінің оқушысы Тоқтар Әубәкір «Көрермен көзайымы», А.Үсенов атындағы мектебінің оқушысы Рахат Алмасбекұлы «Шымыр жігіт», «Югнаки» мектебінің оқушысы Зиннур Ашрабов «Өнерлі жігіт», №12 мектептің оқушысы Дарын Айдаров «Сымбатты жігіт», М.Әуезов атындағы мектебінің оқушысы Дінмұхаммед Құрманбекұлы «Талантты жігіт» номинацияларына ие болды.