Олимпиада жеңімпаздары марапатталды

Жыл сайынғы дәстүрге сай, жалпы білім беретін пәндердің Республикалық олимпиадасы өтіп келеді. Биылғы пән олимпиадасына Кентау қалалық адами әлеуетті дамыту бөліміне қарасты мектептерден 44 оқушы қатысты. Олар қоғамдық — гуманитарлық және жаратылыстану — математикалық бағыттар бойынша білім бәсекесіне түсіп, 25 орынды жеңіп алды.
Қала әкімінің міндетін атқарушы Арман Басаров жеңімпаз атанып, жүлделі орын алған оқушыларды құттықтады.
«Жеке дарын жетілмейді, дарындар сайыса жүріп, бірін-бірі жетелейді» дегендей, кентаулық оқушылар өздерінің білім, білік дағдыларын іс жүзінде сарапқа салып, жоғары көрсеткіштер көрсетіп, жеңіспен оралды. Алдағы уақытта да қаламыздың атын шығарып, білім деңгейлеріңіздің биік екендігін дәлелдей беріңіздер. Білімді, талантты, дарынды оқушыларды дайындаған, олардың қабілеттерін шыңдап, баптаған барлық пән мұғалімдері мен оқушыларға алғыс білдіреміз», — деді Арман Амангелдіұлы.
Сондай-ақ, жеңімпаздарға пән олимпиадасының, «Тұран» олимпиадасының алғыс хаты мен «Елбасы» медалін табыс етті.