Кентау қаласының әкімі Рашид Аюпов газдандыру жұмыстарын 2 айдың жобасында шешуді жоспарлап отырғандығын айтты, деп хабарлайды KentauINFO.kz.
Жергілікті «Тұран-Түркістан» телеарнасына берген сұхбатында Рашид Абадұлы жақын арада қала халқын газбен қуантатындығын жеткізді.
«Кентаулықтар «газ келеді» деп 3 жыл бойы үміттеніп күткен. Бұл бағытта үлкен жұмыстар атқарылған. Дегенмен, қосылу мәселесіне келіп тірелген. Қазір бүкіл командамен алдағы күз, қыс айына дейін газға толық көшу мәселесін қолға алып жатырмыз. Бұйыртса жақын арада тұрғындарды газбен бір қуантамыз», -деді ол.
Сондай-ақ, қала әкімі бұл бағыттағы жұмыстар бойынша Түркістан қаласында мол тәжірибе жинақтағандығын жеткізді.
«Маған үлкен сенімділік беретін Түркістан қаласындағы қызметім. Газдандыру жүйесі басымнан өткен соң, жеңіл болады. Өзіме екі ай деп мерзім қойдым. Бірақ оның алдында енгізсем деген жоспарым бар» — деді Рашид Аюпов.
