Кентауда 846 оқушы мектеп бітірді

Қала әкімі Рашид Аюпов қаладағы №10 мектептің соңғы қоңырау кешіне қатысты. Білімділер мен дарындыларды тәрбиелеп шығарған білім ордасының ұстаздарына алғыс білдіріп, жас түлектерге сәттілік жолдады.
«Бүгін еліміздегі барлық мектеп қабырғасында қоңыраудың сыңғыр үні жас түлектер үшін соңғы рет соғылып, үлкен өмірдегі жаңа қадамдарына жолдама берілуде. Кентау қаласы осы сәтке дейін, білімі жағынан басқа өңірлерден әрдайым жоғары болып келеді. Алдағы уақытта, солай жалғаса беретініне сенем. Себебі, қаладағы білікті де білімді ұстаздардың арқасында бұл көрсеткіш төмендемейді. Алда келе жатқан Ұлттық Бірыңғай тестілеу науқанында ұстаздарыңыздың талай жылғы төккен тері мен еткен еңбегін ақтап, қаламыздың абыройын асқақтатуға бар күш-жігерлеріңізді салады деп сенемін. Үлкен өмірге жасайтын қадамдарыңыздың алғашқы сынағынан сүрінбей өтіп, ойлаған жоспарларыңыздың жүзеге асуына тілектеспін»,- деді қала әкімі.
Сондай-ақ, Рашид Абатұлы салтанатты шарадан соң жас түлектермен бірге мектеп ауласындағы аллеяда тал отырғызу шарасына қатысты. Онда мектеп бітірушілер өз тілектері жазылған қағазды талға қалдырып, үлкен өмірге қадам басу үрдісін көрсетті.
Жалпы, Кентау қаласында 2021-2022 оқу жылында жалпы орта білім беретін мектептерді 846 оқушы бітіреді. Оның 730-ы (86,2%) Ұлттық бірыңғай тестілеуді тапсыруға ниет білдіріп отыр. Оқушылар арасында 72 бітіруші «Алтын белгіге», 39 бітіруші «Үздік аттестатқа» үміткер.