Түлкібастық Бейбіт Бөкешов – омарташы. Ол отыз жылдан бері бал арасын өсірумен айналысып келеді. Омарташы араның «карника», «карпатка» деп аталатын екі түрін асырайды екен. Араның бұл түрі ауа райы қолайлы болса күніне үш-төрт келіге дейін бал береді дейді.
Бейбіт Бөкешов бұл кәсіпті алғашқыда Валерий Павлович есімді танысынан үйренген екен. Кейін омартаның қыр-сырына қаныға бастаған Бейбіт Бөкешов кәсібін ары қарай өзі дөңгелетіп алып кетіпті. Кейіпкеріміздің айтуынша, ол ерте көктемде тау мен тасты аралап, араның бабын іздеп кетеді екен. Сөйтіп, сол сапарынан қара күзде бір-ақ оралады екен.
— Бұл кәсіптің алға басуы ауа-райына тікелей байланысты. Ауа-райы қолайлы, жылы болса онда омарташылардың да арадан алатын балы көңілдегідей болып шығады. Бәйдібек, Ордабасы, Отырар, Шардара аудандарының таулы, қырлы, жазық даласын шарлап, араның қорегін іздейтініміз содан. Бал аралары таулы жерде кекіре, киікоты, жоңышқа, түймедағы секілді 700-800 шөптермен қоректенеді. Жөке ағашы, бақбақ, жебіршөп, ошаған, аршагүл, қойбүлдірген, бөріжидек, шыршалардың да аралар үшін пайдасы көп. Менің екі вагонда сексен ұям бар, — дейді кейіпкеріміз.
Бейбіт Бөкешов аралар өте сезілтал келетінін айтады. Олар үшін омартаның таза болуы өте маңызды. Бір қызығы, олар жалқау, бойкүйез араларды өз орталарына қоса қоймайды екен. Сосын аралар шөлдегіш келеді екен. Күніне екі-үш фляг су ішіп қоятын көрінеді. Биылғы жаздың араларға да оңай болмағаны анық…
Омарташылар жиі-жиі орын ауыстырып отырады екен. Бейбіт Бөкешов бір жерде ұзақ тұрып қалса балдың сапасы нашарлап, көлемі де азайып кететінін айтады. Айта кетейік, араның балы қан айналымына, буындарға, жүрек, бауыр, өкпе, бүйрек, асқазан аурулары үшін өте пайдалы.
