Бүгін Қажымұқан атындағы облыстық спорт музейінде «Жеңісті күндерде жүздескенше» тақырыбында қазақ телевизиясының майталманы, Сейдахмет Бердіқұлов атындағы сыйлықтың иегері, белгілі спорт комментаторы Амангелді Сейітханды еске алу кеші өтті.
Спорт журналистикасында айшықты із қалдырған дара тұлғаның өнегелі жолын ұлықтаған шараға Ордабасы ауданы әкімінің орынбасары Қыдырбай Сейітқұл, облыстық мәдениет және туризм басқармасының бас маманы Нұрдәулет Сұлтанбек, облыстық дене шынықтыру және спорт басқармасы басшысының орынбасары Жазира Муслимова қатысты.
Сонымен қатар, еске алу кешіне Амангелді Муатханұлының жары Назгүл Үркімбаева, ұлы Бекасыл Сейітханов, шәкірттері Телжан Күдеров, Жандос Айтбай, Қанат Базылхан арнайы қонақ болып, біртуар азамат туралы естеліктерімен бөлісті. Естелікке толы кеш дарынды оқушылар мен Шәмші Қалдаяқов атындағы облыстық филармония өнерпаздарының мазмұнды өнерімен өрнектелді.
Шара барысында облыстық спорт музейінің ұйымдастыруымен «Жағымды жаңалықтың жаршысы болған жампоз жан» атты Амангелді Сейітханға арналған көрме ашылды. Бұл көрмеде қазақ телевизиясының саңлағы туралы тың деректер мен құжаттары қойылған. Игі шараға келген отбасы мен шәкірттері музей қорына өзге де құнды жәдігерлерді сыйға тартты.
Аталған көрмені алдағы уақытта өңір қонақтары музей төрінен тамашалай алады.
